[{"content":" 番：《日常》 # 一句講晒就係極致嘅認真配上極致嘅on9。可惜可能係因為太多日文梗，整體唔太中我，但毋庸置疑係成本無限製作！\n戲：《禍然率71》 # Haneke系列；又係閪迷到傻；純粹就係感覺好後設咁砌一套戲出嚟。\n戲：《瘋殺遊戲》／《Funny Games》 # Haneke系列；好睇！非常到肉，so far咁多套入面最好睇，第一次睇到咁「惡」嘅戲。\n戲：《再見中國》 # 電影洞穴系列；低清到傻；比較好奇當年到底係點拍？\n戲：《定理》 # 電影洞穴系列；完全唔知想講咩。\n戲：《尋秦記》 # 難得入場睇嘅戲；好Marvel；早知睇第二套。\n戲：《十萬火急》 # 銀河映像／杜琪峯系列；有啲位都幾尷吓；比較好奇火場畫面係點拍？\n戲：《香港製造》 # 嗰種屋邨純樸嘅味道好係我視角中嘅香港；似係講回歸？\n戲：《破地獄》 # 翻睇藍光加長版；「你可唔可以唔好咁負面啊？」真係金句；結果加長版都唔係真係咁長。\n戲：《真心英雄》 # 銀河映像／杜琪峯系列；anamorphic鏡就係好睇！幾有《暗花》feel。\n","date":"2026/05/12","externalUrl":null,"permalink":"/posts/2026%E5%B9%B42%E6%9C%88%E7%9F%AD%E8%A9%95/","section":"帖文","summary":"「夠未啊？你想要大團圓結局係咪？」","title":"2026年2月短評","type":"posts"},{"content":"","date":"2026/05/12","externalUrl":null,"permalink":"/posts/","section":"帖文","summary":"","title":"帖文","type":"posts"},{"content":"","date":"2026/05/12","externalUrl":null,"permalink":"/","section":"純粹覺得","summary":"","title":"純粹覺得","type":"page"},{"content":"","date":"2026/05/12","externalUrl":null,"permalink":"/tags/%E7%95%AA/","section":"標籤","summary":"","title":"番","type":"tags"},{"content":"","date":"2026/05/12","externalUrl":null,"permalink":"/categories/%E7%9F%AD%E8%A9%95/","section":"類別","summary":"","title":"短評","type":"categories"},{"content":"","date":"2026/05/12","externalUrl":null,"permalink":"/tags/%E8%A9%95%E8%AB%96/","section":"標籤","summary":"","title":"評論","type":"tags"},{"content":"","date":"2026/05/12","externalUrl":null,"permalink":"/tags/%E5%BD%B1%E8%A6%96/","section":"標籤","summary":"","title":"影視","type":"tags"},{"content":"","date":"2026/05/12","externalUrl":null,"permalink":"/tags/","section":"標籤","summary":"","title":"標籤","type":"tags"},{"content":"","date":"2026/05/12","externalUrl":null,"permalink":"/tags/%E6%88%B2/","section":"標籤","summary":"","title":"戲","type":"tags"},{"content":"","date":"2026/05/12","externalUrl":null,"permalink":"/categories/","section":"類別","summary":"","title":"類別","type":"categories"},{"content":" 戲：《秋天的童話》 # 無咩特別；有啲明嗰種去到外國有人幫嘅感覺；我係覺得一齊都唔會keep得耐；最後想講：個男朋友未免太柒。\n番：《頭文字D》(動畫 Stage 1 - 6) # 總算又補完一個童年回憶！第四季小學個陣有買碟返嚟睇，其餘分季嘅動畫都無睇過。頭幾季雖然年份比較早，但係3D動畫同一般作畫嘅部份都完全冇令我出戲！\n劇情上最鐘意第二季，又有呀木線，拓海線又唔錯。比賽最好睇都係一戰ek9，二戰blind attack開燈個下都屈機，但其餘都好麻。第一季每次唔係話危險就話贏唔過，第五季直程係插水式下滑，突然間上原美佳（拓海第二個女朋友）出嚟又話一見鍾情，完全唔記得咗夏樹嘅存在！\n原本想睇埋《MF GHOST》但而家要諗吓先……《Legend劇場版》好似有改啲劇情，希望唔好太柒！\n戲：《頭文字D Legend劇場版》 # 結果原來係劇情上攞咗最精彩嘅部份嚟做，冇修改。雖然製作比較精良，但係感覺冇咗土屋做顧問之後差好遠，例如第一幕慣性飄移竟然冇影腳踏。感覺似係攞嚟銜接《MF GHOST》。\n戲：《暗花》 # 喺碼頭揭曉嗰度幾正；最後決鬥都正；就係太多無謂配樂。\n戲：《愛神》 # 雖然係因為王家衛（導第一篇：《手》）而睇，但最鍾意嘅始終係有Robert Downey Jr.嘅《夢》！第三篇（《欲》）冇乜感覺，亦係感覺最差。\n戲：《英雄本色》 # 感覺就係好以前嘅港產片咁；冇咩好講。\n戲：《窄路微塵》 # 永遠都係港產片咁嘅拍法同劇情，拍唔同啲，講唔同啲都好啊。同𡃁妹食飯個度以為睇唔開，等我仲有少少期待。\n戲：《致我深愛的每個妳》、《致深愛妳的那個我》 # 幾失望；《僕》（《致我深愛的每個妳》）根本唔應該講《君》（《致深愛妳的那個我》）嘅劇情，我覺得甚至乎唔應該有任何重複嘅畫面；呢個內容量其實做一套長少少嘅戲都夠。最關鍵係你本身已經預設咗有順序嘅話就唔使分開。\n戲：《BLUE GIANT 藍色巨星》 # 日常畫得一般呢；始終最撼動到我嘅都係二重奏！\n戲：《愛情酒店》／《Love Hotel》 # 電影洞穴系列；啲鏡用得唔錯；啲long take都有啲design；好似有少少印象；扯住睇真係好辛苦。\n戲：《五時到七時的琪奧》 # 電影洞穴系列；瞓咗幾次先睇得完；唱歌個幕去到黑色背景幾自然幾正；冇咩感覺冇咩好講。\n戲：《法外之徒》 # 電影洞穴系列；似係串荷里活警匪片；一樣冇咩感覺冇咩好講。\n戲：《六弄咖啡館》 # 因為想睇自殺情節而返睇；再睇覺得其實都幾爛吓；現在線嗰啲對白真係幾做作同廢；其實唔係愛情片係友情片。臭雞你最好後悔一世！\n劇：《愛情怎麼翻譯？》 # 為咗高允貞而睇；完全冇其他地方好睇，最精彩其實就係第一集。\n劇：《認罪之罪》 # 有啲似印象中嘅《小女子》，但感覺execute得比較差；可以多啲伏筆；節奏少許慢但唔算差；有啲遠鏡同構圖幾好睇。\n劇：《我的出走日記》 # 整體而言幾失望吓。美貞線（主線）感覺係最差嘅，後期具先生（男主角）嘅發展幾無謂下，啲對白又好做作。琦貞（家姐）線咗比較典型韓劇發展，最後曹泰勳（家姐男朋友）講嘅嘢係幾正。昌熙（阿哥）線其實潛力係最高，可惜篇幅放晒喺主線度結果發展得太快。\n好多位感覺都冇打燈係幾有趣。\n戲：《第七大陸》 # 影唔到主體同好多still shot呢part幾符合我風格；閪迷到極致；感覺太過後設。\n戲：《八部半》 # 電影洞穴系列；又係瞓咗幾次先睇得完；感覺係講做電影？最後講嘅嘢都好符合現代嘅狀況。\n戲：《班尼的錄影帶》 # 冇之前咁閪迷，睇得幾順下；一開頭Get錯最後係自首。\n紀錄片：《殺人凶戲》／《The Act of Killing》 # 唔知係因為豬文劇透定我本身都知呢個世界有幾fuck up，我係冇乜feel嘅。好好奇如果冇劇透會係點。\n戲：《大寫特寫》／《Close-Up》 # 電影洞穴系列；就咁睇冇乜感覺，知道係混合咗啲紀錄片成份之後感覺幾有趣。\n","date":"2026/04/03","externalUrl":null,"permalink":"/posts/2026%E5%B9%B41%E6%9C%88%E7%9F%AD%E8%A9%95/","section":"帖文","summary":"「阿智啊，對唔住。」","title":"2026年1月短評","type":"posts"},{"content":"","date":"2026/04/03","externalUrl":null,"permalink":"/tags/%E7%B4%80%E9%8C%84%E7%89%87/","section":"標籤","summary":"","title":"紀錄片","type":"tags"},{"content":"","date":"2026/04/03","externalUrl":null,"permalink":"/tags/%E5%8A%87/","section":"標籤","summary":"","title":"劇","type":"tags"},{"content":" 擔心 # 《機醫》作為我最鍾意嘅韓劇之一，我係非常之期待佢嘅續作。而《機住》作為《機醫》嘅續作，當時我知道要出嘅時候係有啲意外，我甚至有啲擔心出嚟效果會好令人失望。其一就係之前Netflix先出完一套醫療劇，更甚在於由《回答吧》系列到《機智》系列一直都有好多翻炒嘅成份，小至玩梗大至玩前傳彩蛋甚至劇情。喺呢個context底下好易拍得唔好睇。而到實際睇嘅時候好彩係比我想像中好睇。\n放下心頭大石 # 當然我覺得近乎每集都玩《機醫》嘅彩蛋係有啲炒冷飯，但係整體而言都係唔錯睇的。相比起《機醫》，《機住》更加似一套典型嘅韓劇，其一在於劇情結構係一條主線加多條支線，其二在於整體嘅論調同橋段。與其話係《機智》系列嘅續作，更多似係用《機智》系列作為背景嘅衍生作品。即使係咁樣，呢套單獨嚟睇都係一套唔錯嘅韓劇，甚至乎我覺得應該掹走大部份嘅彩蛋，老實講集集都咁出嚟真係有啲煩……\n對比《機醫》，值得留意嘅係，《機住》嘅導演同編劇都唔同咗人，我諗呢一樣可能解釋到各方面同《機醫》唔同嘅原因。\n《Someday》 # 有一日，聽住《Someday》（《機醫》結局soundtrack）望住個日落，我覺得好可能唔會有第二套劇取代到《機醫》喺我心目中嘅地位。《機住》唔會取替到，往後《機智》系列嘅劇大概都唔會取替到。\n","date":"2026/01/17","externalUrl":null,"permalink":"/posts/%E4%B8%8D%E8%B2%A0%E6%88%91%E6%9C%9B%E6%A9%9F%E6%99%BA%E4%BD%8F%E9%99%A2%E9%86%AB%E7%94%9F%E7%94%9F%E6%B4%BB%E7%AC%AC%E4%B8%80%E5%AD%A3%E8%A9%95%E8%AB%96/","section":"帖文","summary":"「唔使緊張喎小明，呢個只係一個小手術嚟咋。」「醫生我唔係叫小明喎。」「我知啊，我係小明啊。」","title":"不負我望：《機智住院醫生生活》第一季評論","type":"posts"},{"content":"","date":"2026/01/17","externalUrl":null,"permalink":"/categories/%E5%BD%B1%E8%A9%95/","section":"類別","summary":"","title":"影評","type":"categories"},{"content":" 前言 # 喺呢篇文度就總結一下喺2025年睇過嘅影視作品當中，喺唔同方面最為突出嘅作品。以下嘅作品只會提及喺2025年我新睇嘅作品，絕大部份都唔係喺2025年出品，而且翻睇嘅作品亦唔會列入考慮當中嘅。\n純粹覺得最好睇嘅劇 # 2025年都係睇咗唔少劇，中間甚至有段時間係咁睇韓劇添，不過依家反而覺得開套劇出嚟睇要花好多時間負擔好重……呢一年都睇咗啲唔錯嘅劇嘅，而當中最突出嘅大概就係《小女子》。\n作為只有12集嘅劇集，睇之前已經有啲期待，因為通常16集嘅韓劇都會有啲支線去掗時間，而Netflix出嘅12集韓劇都係比較去蕪存菁，節奏緊湊好多。雖然係一套冇乜人提及過嘅劇，但係我覺得係非常好睇。每集都非常緊湊，永遠估唔到之後發生咩事。拍攝手法都好符合我理想中嘅模樣，我會話如果我拍套劇出嚟嘅話大概都會係咁。\n另外覺得好睇嘅有《機住》、《苦盡柑來》、《未知的首爾》、《你和其餘的一切》同《切爾諾貝爾》。\n純粹覺得最好睇嘅番 # 喺2025年睇過最好睇嘅番毫無疑問就係《Solo Leveling》。當然佢嘅劇情並冇任何驚喜可言，但係可以肯定嘅係由頭睇到第二季完，都係爽到仆街。當然做一套爽番嘅門檻係低於做一套有深度嘅番啦，但必須承認嘅係有唔少爽番都係好垃圾，而做到一套持續地爽，而且係非常爽嘅爽番都係有一定嘅門檻。而且最重要嘅係，我真係爽吖嘛。\n其餘覺得唔錯嘅，有收尾令人期待嘅《我推》、唔錯鳩嘅《艾莉同學》、《夏日時光》、《2.5次元》同《地》。\n純粹覺得最好睇嘅戲 # 2025年都冇乜點睇戲，淨係年尾先開始睇吓。如果要我揀嘅話大概就係《PTU》。雖則劇情冇乜特別，但勝在氣氛營造一流。如果冇聽豬文介紹嘅話，可能就會係《非常突然》，可惜知道有幾突然發法就冇乜驚喜。\n純粹覺得配樂最好聽嘅影視作品 # 私心頒比《機住》，陣容鼎盛就不在話下啦，本身配樂都好聽，有啲soundtrack都喺我而家嘅playlist入邊。其餘冇乜印象邊套作品嘅配樂比較突出。\n純粹覺得最驚喜嘅影視作品 # 《小女子》其實都幾驚喜，不過已經俾咗最好睇佢嘅話，再比最驚喜嘅話就好似有啲過分。\n《2.5次元》我會話驚喜程度係相等於《小女子》，齋睇標題以為係鳩番，實際睇原來都有啲認真嘢，而且都講得相當唔錯，真係估佢唔到。\n純粹覺得最難睇嘅影視作品 # 《盾之勇者》一定係當之無愧；非常後悔睇咗三季；想見證人類嘅下限可以睇吓。\n純粹覺得最失望嘅影視作品 # 王家衛系列嘅都幾失望吓，不過主要更多係我唔識欣賞啦。\n《夏天隧道》都相當失望吓。一直都想睇好耐，但最重要嘅橋段係完全講唔通，唔明點解咁都可以上到大銀幕……\n後話 # 2026年除咗希望睇到啲好片之外，亦都希望短評可以準時啲出。另外就係有關入場睇嘅戲，因為其實25年係有入場睇幾場戲嘅，不過都冇寫到落短評到，雖然因為慳錢同聽唔明英文入場嘅機會細咗好多，但係如果入場嘅話都希望會寫返短評。係咁！\n","date":"2026/01/11","externalUrl":null,"permalink":"/posts/2025%E5%B9%B4%E5%BD%B1%E8%A6%96%E4%BD%9C%E5%93%81%E7%B8%BD%E7%B5%90/","section":"帖文","summary":"2025，睇咗啲乜？","title":"2025年影視作品總結","type":"posts"},{"content":"","date":"2026/01/11","externalUrl":null,"permalink":"/categories/%E7%B8%BD%E7%B5%90/","section":"類別","summary":"","title":"總結","type":"categories"},{"content":" 戲：《東邪西毒：終極版》 # 有可能係我睇王家衛最睇唔明嘅戲，真係越睇越閪迷。不過有啲鏡頭係幾得意嘅，個雀籠喺度轉嗰度都幾正，打鬥啲聲音設計都幾得意。但劇情上真係唔知做乜……\n戲：《蝙蝠俠—黑夜之神》／《The Dark Knight》 # 睇太多王家衛開返啲主流片嚟睇。\n再睇返個開場已經冇之前睇咁high；小丑呢個角色真係好正；其實套戲問咗好多個問題值得去細諗；掉轉地址又係好正。\n戲：《墮下的對證》 # 翻睇多次依然好睇。成套戲就係不斷來有罪定無罪。成套戲都冇non-diegetic（故事世界以外）嘅音樂，Daniel（個細路仔）彈鋼琴嗰陣勁有feel。俾我拍戲可能都會係咁樣再加埋全程定鏡。\n最慘始終係隻狗！\n戲：《墮落天使》 # 逼人幫襯真係笑到傻。其餘往常地唔係好知想點。\n戲：《審死官》 # 突然走投無路到開啲周星馳片嚟睇吓，結果又唔覺得好笑，冇咩好講。\n戲：《春光乍洩》 # 啲黑白畫面幾有《Better Call Saul》feel（或者應該係做返轉？），起身煮飯嗰度幾好笑。\n一句講完就係兩個男人喺阿根廷嘅離離合合。冇咩好講。\n戲：《花樣年華》 # 簡單咁講，就係兩個人出咗軌，但係覺得自己冇出軌嘅故事，冇咩好講。\n戲：《國產凌凌漆》 # 又諗住開返啲笑片嚟睇，不過啲梗已經聽得太多次，唯獨是係間諜凳冇乜點聽過幾好笑。其餘一般。\n戲：《鼓動真我》／《Whiplash》 # 我唔肯定之前有冇睇過成套戲啦，但係我係有印象最後嗰一幕Neiman（男主角）擅自開始打鼓嘅。\n講真由一開始我已經唔鐘意Fletcher。由開頭嘅一啖砂糖一啖屎，到之後搵Ryan入團谷佢气，我都覺得Fletcher係極度manipulative嘅人。所以我係極反對佢嘅教學方式，都唔明點解啲人會睇到high，不過我之後發現導演同好多人都係同我同立場。\n我會認同為咗夢想廢寢忘餐，放棄女朋友，唔理其他人意見一意孤行，頭破血流然後成為世界冠軍咁樣係一個good story，但係咁就係咪可以代表Fletcher咁嘅教學方式係啱嘅呢？有人因為咁樣嘅教學方式而成功，同咁嘅教學方式可以令人咁大機會成功，同我哋應該用呢種教學方式係三件事。有咁嘅個例並不代表佢係有效嘅教學方式，就算係有效都未必代表我哋應該要咁做，但係好多人見到有個例就直接跳到去我哋應該要咁做。我諗Fletcher會話呢個係唯一方法培養出頂尖嘅音樂人，但係先唔講呢個係咪真係唯一方法，就算係咁又係咪代表你可以咁樣害死其他學生呢？\n番：《火影忍者疾風傳》 # 終於補完一個童年回憶。繼續以倍速加飛動畫原創咁睇，歷時54日。\n之前已經聽聞忍界大戰爛尾，都估唔到真係咁爛。揭牌斑係帶土（卡卡西老死）係有啲驚喜嘅，但係感覺都係臨時諗出嚟，後面輝夜姬嗰part感覺上都係諗唔到點完就求其作啲故仔出嚟。另一個重點係佐助所有感情轉換都係莫名其妙，點解知道真相之後仍然想報仇，同聽完初代火影之後又轉軚其實都係冇乜點講到個過程。\n《火影》整體嘅打鬥都一般，序章（《疾風傳》前）都還好，《疾風傳》（唔計忍界大戰）真係滑咗牙，其一就係近乎冇用過五行嘅系統，其二就係成日都用替身術，你話影分身都話有啲煙出嚟，分唔到都合理啲啊，替身術真係任你講㗎喎，明明影住你打中佢都可以話係替身，每場都係咁打真係好冇癮。同埋我依家都唔係好知輪迴眼有咩用……\n疾風傳唯一重點就係鼬（佐助阿哥），真係好撚型……\n戲：《通往夏天的隧道，再見的出口》 # 製作係唔差嘅，但我會話條橋係fundamentally唔work囉，明明山窿入面嘅世界係慢咁多，杏子（女主角）收到短訊嗰吓其實點會唔入去呢？講到明明佢咁鍾意薰（男主角）喎，又話冇咗佢唔得，嗰吓完全冇講到點解唔入去囉。\n戲：《一秒拳王》 # 情況類近，都係製作唔錯嘅，但係劇情上實在係太老土，撞車之後我完全分晒心完全唔想睇。\n我想問港產片係咪一定要有一啲唔識講廣東話嘅人……？\n戲：《米奇17號》／《Mickey 17》 # 又係情況類近，原本我就係當普通荷里活片睇，之後佢一講原住民嗰句對白我即刻出晒戲，又係完全唔想睇落去。我一直都唔係反對呢啲DEI嘅理念，但係你一講到咁白就好難睇好出戲。\n戲：《PTU》 # 聽返荼毒室啲live之後開始想睇返啲港產片，其中就包括銀河映像系列，雖然其實更加主要嘅係杜琪峯系列。\n氣氛營造一流，啲特種部隊直程惡過黑社會，不過我係唔知原來特種部隊係要行街嘅。\n戲：《2046》 # 喺睇之前我一直都以為係套未來片，點知原來「2046」只係個房number。唔知係睇得多王家衛定本身個劇情係易follow定係點，感覺開始識睇佢嘅戲：就係唔睇劇情，純粹去feel個氛圍係點。\n戲：《非常突然》 # 一句講晒就真係「非常突然」。可能本身我就唔太理解當時香港嘅氛圍啦，所以都對呢首係入邊嘅隱喻冇乜感覺。再加上聽過豬文講點樣突然法所以又冇乜太大驚喜。唯獨是係李森（劉青雲演）幾好笑，喺醫院嗰幕玩輪椅又係笑到仆街。\n後話 # 呢個月係咁睇戲，真係寫到我仆街！\n","date":"2026/01/08","externalUrl":null,"permalink":"/posts/2025%E5%B9%B412%E6%9C%88%E7%9F%AD%E8%A9%95/","section":"帖文","summary":"「有遮嗰陣時冇雨，有雨嗰陣時冇遮。」","title":"2025年12月短評","type":"posts"},{"content":" 番：《火影忍者》 # 一個禮拜睇完真係黐撚線！不過skip原創加兩／四倍速咁睇係快少少㗎啦。打鬥中間嘅回憶開四倍，冇乜特別嘅劇情或者打鬥開兩倍，咁睇舒服好多。尤其每次出一招影十條友嘅反應真係好煩。雖然我覺得比較合理嘅速度可能係1.5倍，不過應該教唔到所以冇計。\n卡卡西班嘅劇情都一般，比較好睇嘅係鹿丸同小李，雛田打寧次嘅劇情都唔錯。打鬥比較好睇嘅係小李打我愛羅、最後佐助打鳴門。最失望係三代目打初代同二代目，後面幾集都係喺度同大蛇丸來回抽插唔知做乜鳩，暗部又淨係識得做前排觀眾。劇情最失望係佐助出走嗰part，前面講到話要出生入死，後面見到佢出個螺旋丸就話要反面，始終唔係好說服到我點解決定要出走。對比家教我覺得都係《家教》好睇啲，《家教》每個屬性嘅特點再分明啲。\n聽講《疾風傳》仲不如序章，唔求好睇但求睇完。\n戲：《上流寄生族》 # 構圖好好睇。第一次睇嗰陣覺得劇情都好緊湊好正，再睇就冇乜感覺。\n劇：《切爾諾貝爾：傷心的兒童》／《Chernobyl》 # 我唔會叫佢做神劇但的確幾好睇。嗰種極權統治體下嘅審查同階級制度都好有《一九八四》嘅感覺。最後嗰集解釋返到底出事嘅原因係咩都好清楚，就算好似我咁唔識核電廠原理嘅人都聽得明。唯一嘅敗筆就係講英文。\n戲：《旺角卡門》 # 對比往後王家衛嘅戲嚟講，呢套都仲未係好文藝片。一句總括就係MK故事，冇咩好講。\n戲：《古惑仔》第一至三集 # 為咗睇烏鴉而睇，結果烏鴉冇我想像中咁好笑，可能我喺IG已經見得太多，唯一幾好笑嘅係佢跟住佢大佬後面行喺度打拳嗰幕。\n戲：《阿飛正傳》 # Fuck boy故事；開始文藝片feel；冇咩好講。\n戲：《重慶森林》 # 第一段故事冇乜feel，反而第二段何志武（梁朝偉演）幾好笑！越嚟越睇唔明王家衛啲戲其實想點……\n","date":"2026/01/08","externalUrl":null,"permalink":"/posts/2025%E5%B9%B411%E6%9C%88%E7%9F%AD%E8%A9%95/","section":"帖文","summary":"「不過唔好搞到自己咁揦鮓啦，以前白白淨淨咪幾好，依家黄黚黚咁。你睇吓，仲要咁多𤶸添。同人打交嚟啊？」","title":"2025年11月短評","type":"posts"},{"content":" 劇：《你和其餘的一切》 # Came for 金高銀，stayed for 朴智賢（演另一女主角——千商燕）嘅演技！\n呢套劇對我嚟講就係用15集問一個問題：你會唔會接受一個同你最close但係由頭仆街到落腳趾尾嘅friend？至少我係接受到，因為好長時間我都係好討厭商燕，但係到最後我都係接受咗佢，因為「佢係仆街」同「佢係慘」呢兩件事係冇衝突㗎。呢套戲好好咁喺後面呈現返商燕慘嘅嗰面，與此同時又唔會過火得滯變到好左膠咁，呢個就係呢套劇好睇嘅地方。\n劇：《今際之國的闖關者》第一季 # 睇完遊學修講做試當真最high其中個位就係試玩毛扮佢就開咗嚟睇，睇完第一季就棄咗。實在唔覺有咩好睇，最後一個game嘅扭橋仲要係無聊到爆。聽講第三季都唔好睇，咁就多個理由棄啦。\n劇：《我的大叔》 # 又係唔明點解啲人會講到咁神嘅劇。有啲對白係幾正嘅，「日子過得好嘅人容易做好人」、「逆來順受嘅無期徒刑囚犯」呢啲係幾正嘅，但我始終對朴東勳（男主角）呢種爛好人真係冇乜feel。唯獨是朴尚勳（男主角大哥）係幾好笑嘅。後面喺喪禮度乾杯又係笑到仆街，呢個喪禮又係我睇過最warm最其樂融融嘅喪禮。但整體而言真係冇乜感覺……\n劇：《浪漫速成班》 # 之前見到鄭少女已經想開嚟睇。\n但係個劇本實在唔太掂。又係嘥咗個主題，其實啲學生線可以玩得深入好多，補習又可以講吓又冇講過，最後南行慈（南行善家姐，南海伊阿媽）返嚟更加係多鬼餘。金榮珠（女主角老死）嘅埋尾又有啲多咗。扭橋係估唔到嘅，但就稱唔上好睇囉。\n劇：《閃亮的西瓜》 # 前中段幾正，但整體太bbq，好似睇咗十幾集寶礦力廣告咁，太過青春洋溢。結局少少跳。尹清雅（主角阿媽）屋企嘅事件有啲多咗，店長係外公都多左啲。好似好多演員都係新演員，好多演技都好一般……\n最正都係申銀秀（演年輕時期尹清雅）同中間段扭橋。申銀秀真係勁cute！段扭橋又係精彩，光明正大咁影晒出嚟俾你睇都唔會知道，超級surprise。\n","date":"2026/01/08","externalUrl":null,"permalink":"/posts/2025%E5%B9%B410%E6%9C%88%E7%9F%AD%E8%A9%95/","section":"帖文","summary":"「日子過得好嘅人容易做好人。」","title":"2025年10月短評","type":"posts"},{"content":" 劇：《孤單又燦爛的神—鬼怪》 # 今次係睇藍光director’s cut，電視版cut走嘅部份大部份都合理嘅，死嗰度剪接失誤藍光版都冇修正就真係過分啦。\n始終都係：對白無敵；soundtrack冇一首唔好聽；取景超靚；睇未來有bug；消除記憶嘅機制太ad doc；復活之後埋尾係敗筆。\n番：《強風吹拂》 # 呢一套我又係完全get唔到有咩好睇，可能我真係對呢啲熱血番無感。我始終覺得放棄轉跑道嘅走向好睇啲，對我嚟講呢啲實在太老土啦。\n番：《命運石之門》 # 又係唔明點解係神作嘅神作。第一季最後講觀察嗰part幾正嘅，但都僅僅如此。倒帶嘅唔同線對我嚟講都一般，第二季就主要睇真由理同真帆（合法蘿莉）。我對紅莉栖（助手）呢啲傲嬌女主角真係冇乜feel……\n真由理世一！我愛真由理！\n劇：《黑暗榮耀》 # 真係復仇嘅復仇劇，感情線喺我角度嚟講幾無謂。冇乜記憶點，冇值得睇嘅位，亦都唔係難睇。\n","date":"2026/01/08","externalUrl":null,"permalink":"/posts/2025%E5%B9%B49%E6%9C%88%E7%9F%AD%E8%A9%95/","section":"帖文","summary":"「El Psy Congroo！」","title":"2025年9月短評","type":"posts"},{"content":" 劇：《The King：永遠的君主》 # 因為金高銀而睇。\n唔知係咪因為同《鬼怪》同編劇嘅關係，兩者嘅vibe都好似，有種想用返《鬼怪》嘅套路嘅感覺。但係感情線出到嚟效果就太油膩，劇情去到中間都唔錯，埋尾就係講time travel嘅故事嘅老毛病：又係全程自由意志到最後變返做命定論。曹誾燮／曹影（《浮游先生》男主角演）係幾正。\n李敏鎬（演男主角）完全唔靚仔……\n劇：《陽光先生》 # 背景設定唔錯嘅，幾多元，之前冇乜點睇過類近嘅。其中一個入唔到戲嘅位係《魷魚遊戲》嘅負責人做感情戲……感覺真係超奇怪。令我對呢啲革命片都冇乜feel，可能韓國人睇會唔同？有啲位係幾fun都有啲對白唔錯嘅，可能縮短啲節奏快啲會好啲。\n《綠袖子》真係DSE考生PTSD……\n","date":"2026/01/08","externalUrl":null,"permalink":"/posts/2025%E5%B9%B48%E6%9C%88%E7%9F%AD%E8%A9%95/","section":"帖文","summary":"「五分鐘後，本台將會廣播香港中學文憑考試，中國語文科試卷三聆聽及綜合能力考核。而家請大家欣賞，倫敦交響樂團演奏家傳戶曉嘅英國民謠——《Greensleeves》／《綠袖子》。」","title":"2025年8月短評","type":"posts"},{"content":" 劇：《魷魚遊戲》第三季 # 太多bugs，但又未至於爛尾。李名器（大肚婆個ex）真係太廢……節奏而言係緊湊嘅，整體係好睇過第二季，但始終比唔上第一季。都係嗰句嗰：做前傳咪幾好……唔好開續集啦……\n劇：《善意的競爭》 # 當初又係見到16集短嘅有啲期待，結果所有嘢都進行得好快。有啲位都幾尷吓，唔知如果轉做動畫會唔會好啲？最好睇我會話係開放日嗰一集。\n感情線有時會覺得似係情竇初開嘅中學生寫嘅……\n睇姜惠元做戲真係好爽，好似睇住Sana做戲咁！\n劇：《健將聯盟》／《Good Boy》 # 因為金所炫而睇，想講其實佢接嘅劇大部份都好一般……原本見到講奧運有啲期待，結果又係用得好差。淨係high嘅位就係第一集，之後嘅打鬥唔同人其實都冇乜太大分別。整體劇情都幾老土吓，冇乜值得睇嘅位。其實我更想睇退役之後點樣轉行發掘其他可能性……\n劇：《混沌少年時》／《Adolescence》 # 幾失望吓，見到其他人咁高評價以為好特別，turns out又係完全冇feel。睇唔明一鏡到底到底有咩意義。唯一幾fun嘅位就係啲英國口音同用字。\n劇：《Law School》第一季 # 純粹想再睇吓韓劇而翻睇多次。\n完咗楊教授單案之後就一般，楊教授成盤棋係精彩嘅，不過始終冇乜feel。但楊教授嘅個人魅力實在太出眾，真係一個好好嘅老師，佢單案審理嘅過程又係好精彩！唔俾姜率B做證人個理由又係好正。\n聽聞嚟緊出新一季，唔知堅定流。係嘅話希望唔好太柒。\n","date":"2026/01/08","externalUrl":null,"permalink":"/posts/2025%E5%B9%B47%E6%9C%88%E7%9F%AD%E8%A9%95/","section":"帖文","summary":"「好食，百合好好食。」","title":"2025年7月短評","type":"posts"},{"content":" 番：《盾之勇者成名錄》第一至三季 # 狗也不屌！超後悔冇棄番！要鳩冇鳩，要劇情冇劇情。\n番：《BanG Dream! It\u0026rsquo;s MyGO!!!!!》 # 唔明點解當時咁大迴響，我睇完全冇feel……冇咩特別嘅音樂番。唯獨幾鐘意點題個度，exactly原本係leading to nowhere，而家係we are now and here！一開始已經覺得爽世係 bitch所以冇乜感覺。\n劇：《機智牢房生活》 # 又係因為申PD睇。\n兩條感情線都唔錯嘅，但整體上就一般般，唔知係唔係因為我睇完《機醫》再睇先係咁？對比之前《回答吧》系列嘅多主線劇情，呢一套比較似返一般嘅一條主線加多條支線。埋尾嘅部份又唔係好知點take好，有啲又好溫馨有啲又相反咁。金濟赫（主角）做返棒球手我覺得又係一般，我係真係覺得放棄嘅話會好睇好多，不過當然難度都會高唔少啦，可能就係因為咁冇咁寫。\n劇：《未知的首爾》 # 朴寶英出新劇點可以唔睇啊？\n終於係一套冇令我失望嘅短篇，未來嘅感情線就一般，未知嗰條就唔錯。有少少似《精神病房》，不過呢套就冇咁多教育嘅部份，比較多係情感療癒嘅位。雖然我嫌結尾可以再挫敗啲再翻身，不過依家咁都算唔差嘅。\n雙胞胎其實都幾多嘢可以玩，但始終冇玩得好好。我又好奇唔知動畫有冇玩雙胞胎嘅番嘅呢？\n","date":"2026/01/08","externalUrl":null,"permalink":"/posts/2025%E5%B9%B46%E6%9C%88%E7%9F%AD%E8%A9%95/","section":"帖文","summary":"「尋日已經過去，聽日仲未嚟，今日仍然係未知。」","title":"2025年6月短評","type":"posts"},{"content":" 前言 # 這篇短評係喺2025年6月寫嘅。喺內容冇變，只係修改格式、用字之後放上嚟《純粹覺得》。\n劇：《機智住院醫生生活》第一季 # 一句講晒就係當初過分擔心了。《機住》值得單獨一篇文，之後再寫。\n劇：《苦盡柑來遇見你》 # 其實呢套都有諗過開一篇寫，但係咁嘅話呢篇就冇內容……\n總括而言係唔錯睇的。有啲類近《二十五，二十一》又係有唔同時間線，但係佢進一步就係未來線都係主線。成套劇最慘一定係銀明，待遇甚至比唔上銅明真係過分！老母偏心都算，到最後都係冇一件好事發生過。愛純線就係好童話故事，共患難之後結婚生仔。金明線就係更現實嘅情況，有個啱嘅人但係冇啱嘅老爺奶奶，分手之後都幾乎冇同朴忠燮（後來老公）嘅劇情。結局一般但整體都係唔錯的。\n愛純線對比金明線講兩代人價值觀差別又係值得一篇文……\n後話 # 想講5月開始做嘢搵唔到時間睇番／劇，幾乎都係起身做嘢瞓覺……\n","date":"2026/01/08","externalUrl":null,"permalink":"/posts/2025%E5%B9%B45%E6%9C%88%E7%9F%AD%E8%A9%95/","section":"帖文","summary":"「我係婦產科第二年住院醫生，吳怡瑛。」","title":"2025年5月短評","type":"posts"},{"content":" 前言 # 這篇短評係喺2025年6月寫嘅。喺內容冇變，只係修改格式、用字之後放上嚟《純粹覺得》。\n番：《無職轉生～到了異世界就拿出真本事～》第一至二季 # 唔get點解會咁高評價。我覺得對我嚟講冇feel嘅其中一個位就係主線冇好強嘅目的性，導致我冇乜好期待佢之後嘅發展。呢樣亦反映喺其他異世界番入面，同樣例子就有《芙莉蓮》，相反例子就有《OVERLORD》（但係《OVERLORD》劇情真係唔掂……）。另外一樣野就係永遠都要貶低前世嘅價值，屌其實你都係覺得如果自己出世屈機會點點點揸嘛，點解始終要發白日夢喺度打飛機？第一季尾艾莉絲走我又唔明點解會咁大打擊，我完全睇唔出魯迪烏斯（男主角）有幾鐘意艾莉絲，我覺得佢淨係對艾莉絲有性慾望冇感情。睇得最爽就係最後攻略洛琪希（師傅）嘅部分。\n最後想講：洛琪希係唯一正解！唔接受反駁！\n番：《鴨乃橋論的禁忌推理》第一至二季 # 原來係天野明新作，講起角色同配樂都有啲家教嘅味道。\n推理嘅部分撇除人均天才嘅部份之外都ok嘅，其餘感覺冇乜特別。\n番：《我獨自升級》／《Solo Leveling》第一至二季 # 無敵爽片。一開始睇覺得個setting好鬼hea，就咁幾句就帶過左，但係後面越睇越過癮。我覺得佢同其他異世界番最大嘅分別係，成振宇（主角）一直都有明顯嘅成長，而唔係開局就已經無敵。當然打怪個陣個啲「我一定要贏！」嘅時候都係偏尷，鳩嘅地方都係好鳩，尤其係車海印（聞體味嗰個女角色），佢一出場嗰浸鳩除已經出晒嚟。不過整體而言都係非常之爽。\n又但係而家已經贏晒全韓國，唔知之後仲可唔可以keep到呢個成長嘅速度。希望有下季！\n番：《2.5次元的誘惑》第一季 # 一開頭仲以為係純鳩片，睇落又意外地幾好睇。cosplay嘅內容直情係出色到我都冇為意停擺左條感情線，尤其中間嘅三方和解同後面嘅父女團聚，而且都學到唔少關於cosplay嘅嘢。我之前以為cosplay只係整衫，原來仲有同cam man配合呢啲元素。真係學四哥話齋：「你估咁易做毒撚架？」\n到最後兩集突然變鳩仲以為直接完，點解最後講第二期製作決定，講真我覺得咁樣完都算係咁。唔知第二季會點。\n番：《地。-關於地球的運動-》 # 有啲《巨人》feel，又係類近地對抗主流思想。勁多哲學，中後約蘭達（個細佬女）直程直接問點睇個哲學概念。比較surprise嘅位係前半都係用基督教嘅角度理解地動説，每次我以為佢想講上帝已死嘅時候又用基督教嘅角度認同返地動說。後面就拋返泛神論同無神論出嚟更集中地講宗教哲學。幾鐘意個約蘭達大個咗之後講話唔可以捉緊一個信念嗰段。\n其實最慘會唔會係諾瓦克（審判官）？以為死咗個女咁耐仲要發現咁耐以嚟只係個誤會。\n好想睇基督徒會點睇呢套番。\n","date":"2026/01/08","externalUrl":null,"permalink":"/posts/2025%E5%B9%B44%E6%9C%88%E7%9F%AD%E8%A9%95/","section":"帖文","summary":"「但係如果冇咗信仰人就會迷惘。」「咁就迷惘啦，迷惘當中必定會有倫理。」","title":"2025年4月短評","type":"posts"},{"content":" 前言 # 這篇短評係喺2025年4月寫嘅。喺內容冇變，只係修改格式、用字之後放上嚟《純粹覺得》。\n劇：《機智醫生生活》 # 用藍光重溫，但係因為藍光係director’s cut啲字幕係對唔上，結果我要人手去較每一集嘅字幕timestamp，搞到我睇嘅時候冇乜feel。不過反而令我有啲客觀咁去睇佢嘅時間分配，而家覺得第二季後面其實冇咁趕。\n第二季嘅playlist依然係神。期待申PD新作！\n番：《龍與虎》 # 唔想睇未完嘅番唯有睇舊番。其中一套被推薦嘅番，但感覺冇話特別好睇。\nTiger係幾cute。學園祭幾好睇，其餘真係冇咩特別感覺。\n番：《老夫老妻重返青春》 # 日常ppt；幾溫馨幾好笑；冇咩好講。\n劇：《我們的浪漫電影》 # 朴寶英新劇當然要睇，我感覺而家鐘意朴寶英多過金所炫添。\n又係短篇令我過份期待。個vibe係幾似那年夏天嘅，好幾集嘅結尾都好吸引我睇落去，但係亦僅僅如此。電影嘅部分發揮得唔夠多，主題性唔強，劇情亦冇乜太驚喜嘅部分，唯一就係高峻（男主角阿哥）死之後竟然係直接跳到講高謙（男主角）點釋懷；但係本身我對阿哥又冇乜feel。孫珠雅（支線個女角色）更係令人覺得莫名其妙。當初因為啲濕鳩理由分手都算，然後淨係為咗自己套戲搵返人地，俾多次假希望hurt多次人地。有咩理由話人地自私？根本最自私就係你！\n我只想問：所以到底朴寶英幾時先接到校園劇嚟做？\n劇：《浮遊先生》 # 一句講晒就係冇乜感覺。當初又係見到少集數有啲期待，turns out根本冇關係，睇完都係對所有線冇feel。印象最深刻就係講喺孤兒院嗰個intro，實在係太正啦：「神愛細佬，但係佢陪唔到每個細路，所以佢就創造咗媽媽，但係佢做嘅媽媽數量唔夠，所以有啲細路只能夠等媽媽嚟揀佢哋。」然後再影佢每次迎合領養嘅人嘅喜好都係冇俾人揀，真係好撚諷刺。\n番：《夏日時光》 # 澪最高！澪係唯一正解！\n劇情幾緊湊刺激，製作都相當唔錯，尤其係喺學校打鬥嗰場根本係電影級數。唯獨是係個結局太美好，同埋都係大路time travel片嘅問題，前面全部都係自由意志最後又變咗命定論，除此之外都冇咩問題。\n好羨慕窓（男主角慎平個friend）可以同兩個澪一齊！\n劇：《喜歡的話請響鈴》 # 可謂一切嘅開端！\n之前覺得應該要揀黃宣梧（第一季嘅男朋友），再睇覺得其實同李惠永一齊先正路。\n問題有兩個，其一就係個設定玩得太差了，呢個咁簡單嘅設定發揮空間好大，但係用到嘅地方真係唔多。其二就係佢結局係想強調金朝晀（女主角）用佢自己嘅意志去選擇，但係首先佢都唔似係自己去選擇，佢都係比李惠永打動到，而且除咗喺結局之外我都感受唔到佢係自己去揀，最可惜都係第一點，真係太浪費咗呢個setting啦。相反嘅例子應該就係《無用嘅謊言》，同樣係簡單嘅設定，劇情大路但相對而言玩個setting玩得意外地唔錯。\n","date":"2026/01/08","externalUrl":null,"permalink":"/posts/2025%E5%B9%B43%E6%9C%88%E7%9F%AD%E8%A9%95/","section":"帖文","summary":"「神愛每個細佬，但係佢陪唔到全部細路，所以佢就創造咗媽媽，但係佢做嘅媽媽數量唔夠，所以有啲細路只能夠等媽媽嚟揀佢哋。」","title":"2025年3月短評","type":"posts"},{"content":" 前言 # 這篇短評係喺2025年4月寫嘅。喺內容冇變，只係修改格式、用字之後放上嚟《純粹覺得》。\n番：《BEASTARS》第一季至第三季part 1 # 原本以為已經完咗，點知原來第三季分係兩part，學撚埋《巨人》啲濕鳩嘢。如果係咁的話啫係同漫畫節奏差不多，只能夠講實在係太可惜了。佢嘅世界觀真係好特別，但係感覺去到後面冇乜好好發揮呢一個優點。\n番：《進擊的巨人》 # 純粹睇劇場版前重溫，冇咩好講。\n藍光好睇，可惜第四季開始藍光都係朦。\n劇場版後面嘅片段估唔到幾長下。除咗感動都係感動！\n番：《不時輕聲地以俄語遮羞的鄰座艾莉同學》第一季 # 鳩片要有！係幾好睇嘅鳩片。\n始終唔覺得艾莉deserve做學生會會長……\n","date":"2026/01/08","externalUrl":null,"permalink":"/posts/2025%E5%B9%B42%E6%9C%88%E7%9F%AD%E8%A9%95/","section":"帖文","summary":"「好開心可以同你哋一齊睇戲，如果有續集嘅話再一齊去睇呀。」","title":"2025年2月短評","type":"posts"},{"content":"「……遊戲開始。」\n前言 # 這篇短評係喺2025年4月寫嘅。喺內容冇變，只係修改格式、用字之後放上嚟《純粹覺得》。\n短評嘅緣起 # 喺寫2024總結嘅時候，發現對年頭睇嘅劇／番根本已經冇乜印象，所以決定轉做每個月寫睇完嘅感想，仲因為咁想寫個note taking app。結果個app拖到早排先寫好，而呢幾篇野就拖到而家先開始寫……\n劇：《現在撥打的電話》 # 原本見到得12集等我仲好期待，點知完全廢到一個點，明明手語嗰part本來可以發揮吓。劇情上冇咩特別，後面嘅扭橋都係為咗扭橋而扭橋。真係好典型好老土嘅韓劇。因為洪熙珠（女主角）根本就唔係啞嘅，結果佢多數時間都喺度打電話講嘢，所以主題性又係冇乜。\n唯一好睇嘅地方就係蔡秀彬（演女主角）。\n劇：《魷魚遊戲》第一至二季 # 為咗第二季再由頭睇過。\n第一季係唔錯的，但係第一季嘅結局令我覺得第二季完全冇可能好睇，而第二季絕大部份都係冇乜特別。第一季好睇嘅話就係好多人死，但係第二季有經驗加持個個都唔死，有啲位第一季嘅話就已經反左面又冇反。最好睇嘅就係最後一集去反抗。唔知第三季會點。\n番：《【我推的孩子】》第一至二季 # 都係為咗第二季由頭睇過。\n再睇都係覺得三個女角色對於我嚟講都係冇乜興趣。不過如果你叫我揀嘅話我可能揀有馬。\nAqua嘅復仇路線暫時停擺，不過最後轉做Ruby令我幾期待。再聽首歌印象完全唔同。\n劇：《小女子》 # 超級無敵勁好睇！唔知點解以前完全冇聽過！每集都緊張刺激，完全估唔到下一集嘅走向。全程懷疑崔道日有內幕，到最後原來都確實係一個鍾意錢嘅男人。\n構圖都好好睇，喺新加坡入院嗰集直程係拍埋我想像嘅構圖出嚟。\n只能夠講：果然係tvN！\n","date":"2026/01/08","externalUrl":null,"permalink":"/posts/2025%E5%B9%B41%E6%9C%88%E7%9F%AD%E8%A9%95/","section":"帖文","summary":"「……遊戲開始。」","title":"2025年1月短評","type":"posts"},{"content":"","date":"2026/01/05","externalUrl":null,"permalink":"/categories/%E7%B4%94%E7%B2%B9%E8%A6%BA%E5%BE%97/","section":"類別","summary":"","title":"《純粹覺得》","type":"categories"},{"content":" 緣起 # 喺幾年前開始，我睇完啲韓劇就會寫低自己嘅諗法再po上IG private account度。與其話係俾啲friend睇，其實更多想記錄低自己嘅諗法。之後開始睇吓動畫睇吓戲，好多時睇完都會喺間房度行嚟行去，喺個心入邊係咁諗呢個番點、呢個結局點，其實都係想同人講吓自己點諗。而今日終於扚起心肝，買咗一個domain，開咗呢個網。\n點樣講？ # 睇到呢一度嘅你已經留意到，呢篇文並唔係用書面語寫。包括呢一篇文在內，我喺呢一個網度寫嘅所有文都會用香港人講嘢嘅「方式」寫出嚟。我呢度用「方式」而唔係用「語言」，係因為本身香港人講嘢就係會用好多唔同嘅語言，大部份情況下都係中英夾雜，甚至乎有時會講吓國語、韓文、日文等等其他語言。所以如果你話香港人應該要淨係講廣東話嘅話，我會覺得呢個係幾無謂嘅執著。\n講咩？ # 喺呢個網度講咩其實都冇一個好確實嘅決定，主要就講吓對影視作品嘅諗法，可能都會講吓最近聽嘅歌，甚至乎講吓哲學。不過幾肯定就係唔會講我嘅個人生活，至少唔會講關於有可能透露我身份嘅嘢，到時俾人相認就尷尬啦。同埋可以確定嘅係，呢個網度寫嘅所有文都會係我自己嘅諗法，唔會有任何一隻字係由AI打出嚟嘅。\n《純粹覺得》 # 以至於點解會改呢個名，係因為我作為一個唔係讀好多書，又唔係睇好多戲嘅人，好自然地都講唔到啲咩高見出嚟。大部份時候都唔會點樣細諗，只係「純粹覺得」套戲點點點或者套劇點點點，講吓我睇完之後嘅感受。所以唔好期望喺呢度可以有啲咩得着，你就當係我個人嘅筆記簿唔小心公開咗出嚟俾人睇。啱睇嘅就睇，唔啱睇嘅就歡迎唔好睇。\n","date":"2026/01/05","externalUrl":null,"permalink":"/posts/%E7%B4%94%E7%B2%B9%E8%A6%BA%E5%BE%97/","section":"帖文","summary":"2026年，AI發展一日千里，喺呢個睇片都就嚟分唔真假嘅年代，我竟然開咗個blog……","title":"《純粹覺得》","type":"posts"},{"content":"","date":"2026/01/05","externalUrl":null,"permalink":"/tags/%E5%80%8B%E4%BA%BA/","section":"標籤","summary":"","title":"個人","type":"tags"},{"content":"","externalUrl":null,"permalink":"/authors/","section":"Authors","summary":"","title":"Authors","type":"authors"},{"content":"","externalUrl":null,"permalink":"/series/","section":"Series","summary":"","title":"Series","type":"series"}]